Núna er tími eftirvæntingarinnar. Núna er líka tími uppgjörsins þar sem tími gefst til að hugleiða árið sem er að líða. Einnig er þessi tími, tími kvíðans og hræðslunnar.
Aðventan er tilfinningaríkur tími sem snertir okkur öll á einhvern hátt. Flest okkar geta tekið þessum tíma opnum örmum og gert það besta úr honum fyrir okkur sjálf, vinkonur okkar og vini.
Við kunnum að njóta og látum auglýsingar og annað skrum ekki trufla okkur. Við vitum að jólin byrja ekki í IKEA heldur kl.18 á aðfangadagskvöld. Við vitum líka að undirstaðan að hamingju heimilisins fæst ekki í Húsasmiðjunni heldur er hún undir heimilisfólkinu komin.
En það er alls ekki auðvelt að vera svona skynsöm þegar alls staðar er kallað. Vertu eyðslukló. Kauptu núna – borgaðu seinna. Kauptu einmitt þetta, þetta er alveg nýtt og allt öðruvísi. Núna er tækifæri til að breyta. Kaupa minna, nota það sem er til, gefa minningar í gjafir, baka og drekka heitt súkkulaði með rjóma heima. Ef mér tekst að velja fyrir mig, velja það sem ég held að sé best og réttast og er sátt við er ég skynsöm.
En það er vont fyrir fullorðið fólk að kvíða og vita ekki hvað morgundagurinn ber í skauti sér. Kvíða því sem verður og kannski enn meira því sem verður ekki. Það er einmitt þetta sem hendir fullt af fólki á aðventunni. Þá er kúnstin að geta brugðist við. Það þýðir lítið að sitja og bíða. Við verðum sjálf að leita lausna. Ein lausnin gæti verið að uppgötva að við erum sjálf bestu skemmtikraftarnir. Við erum jú alltaf til staðar. Ekki eru það hin, þessi sem eru út um allar trissur að missa sig yfir tilbúnum þörfum.
Guð vinkona okkar er líka alltaf til staðar. Það er gott að hafa stuðning hennar þegar við erum alveg að missa móðinn og að því komin að kaupa núna og borga seinna. Hún styður þína ákvörðun því hún er rétt – núna – hver sem hún er.
Njótum aðventunnar!
Ásdís Ólafsdóttir